آآآه يـا بـلـــدي

د. فتحـــــي عمـــــــر نصــار

فوق ترابك ظلم هايش...و احنا غارقين في اللجاج
ناس بتشرب من مجاري.. و ناس بتلعب عالبلاج

كلتي لحم عيالك انتي... ليه خسيسك صار شريف
مين يقول إنك فرمتي.. عزنا علشان رغيف
آآه يا بايعه عِزّ وِلْدِك.. لَجْل خاطر مش نضيف

تحت سكه من حديد... نمنا.. و القضبان تقيـد
فوق عِضامنا الكل يدهس.. حتى آآه حدش يزيد
آآه يا داهسه عيالك انتي... كل يوم فيكي جديد

خط فقر علينا لابس... و اتعمل لينا خصـوص
كان قوالب فينا تضرب...من جتتنا صار فصوص

تحت خط الفقر أديني.. أشكيِ ليكْ دمعي الحزين
مين يا غالي يسِد ديني... صار كبير مثل الجرون
بكره فوقو نبات و نبكي...أو نزغرد مِ الجنون

فين طبيبك راح يا غالي.. دا الدعامة بميت ألوف
و العذاب اللي فـ قلوبنا.. سدها حتى الأنوف

يا اللي واكله عيالك انتي.. رايحه تاكلي فينا مين
عشنا أيامنا في ضِلِّكْ.. لحن ضِـلِّك ناي حزين
و اللي شاكي.. و اللي باكي... و اللي حـاكي الشقيانين
كلهم في هواكي ضَلُّوا... آآه يا حضن البأسانين