قصيدة الغربة
للشاعر الكبير أشرف عيسى
الغُربة في المكان...
ولا الدنيا والزمان؟
قلبي مليان بيبان
أدخل وشوف
ونعكش في الصمام
هتلاقي كبشة حروف
بتخلق م النبض
حبة كلام
وشوية سلام
وشوية نصر
على شوية إنهزام
أدخل وشوف
وحش شجاع
متكلفت بتوب الخوف
ولفة سواقي
ودهن العتاقي
وزمن ولّي
لا خلّي
طمبور ولا شادوف
أدخل شوف
قلب مفتوح ع الحماد
بتلف جواه البلاد
كما الرحايه
وفرسان راجعين
بلا رايه
وقلب عايش
برّايا
أدخل وشوف
ولد صغير
بلا ألعاب
منزوع الطفوله
ولد
مكانش فاهم الفوله
قلبه متعلق
ما بين رحلة الخضار
وجفاف العقوله
ما بين غُماية الحياة
ومعاناة الجغوله
أدخل وشوف
سرداب
وأغراب
ونايات ورباب
ووهج هرّاب
وسراب
ويا ما في الجراب
أدخل وشوف
البنت الملفوفة
في توب القلق
بحر عيونها
مفتوح للغرق
وليل شبطان
في شعرها اللي اتفرق
واللي اتسرق
من شوية همج
قطاع طرق
أدخل وشوف
بسمة الشوارع
جنب ضحكة البيوت
دلوقتي عد معايا
كام تابوت
متعدش معايا الكلام
عد معايا السكوت
أدخل وشوف
دور معايا ع القيمة
ع البدايات
ع المودة ع السكن
أو باختصار
دور معايا ع الوطن!!
( ارتجالة ما قبل الفجر)
